Vijon Forumi Shkencor në Akademinë e Shkencave

TIRANË, 12 korrik /ATSH – I. Vata/ Akademia e Shkencave mbajti sot në Tiranë, Forumin Shkencor “Speciet invazive në ekosistemet ujore dhe efektet e ndryshimeve të klimës”.

Forumi u çel me fjalën përshëndetëse të Kryetarit të Seksionit të Shkencave Natyrore dhe Teknike, akad. Neki Frashërit.

Ai theksoi se qëllimi i forumit është paraqitja e problemeve që kanë të bëjnë me praninë e specieve autoktone shtazore apo bimore në ujërat e Shqipërisë dhe paraqitja e sugjerimeve e rekomandimeve për zbutjen e efekteve nga prania e tyre, në prani të ndryshimeve të klimës, të cilat janë duke u bërë përherë e më evidente.

Forumi Shkencor “Speciet invazive në ekosistemet ujore dhe efektet e ndryshimeve të klimës u mbajt me dy sesione të moderuara nga akad. Neki Frashëri, prof. asoc. Rigers Bakiu dhe prof. dr. Petrit Zorba.

Në të parin u prezantuan punimet shkencore për peshqit, invertebrorët, algat dhe bimësinë ujore dhe në të dytin studimet për efektet e ndryshimit të klimës në sektor me interes për ekonominë e vendit.

Nga këto kërkime shkencore u arrit në konkluzion se: Së bashku me ndryshimet e klimës, introduktimi i llojeve aloktone njihet gjerësisht të jetë një prej kërcënimeve kryesore ndaj biodiversiteti ujor dhe të ketë impakt në aktivitete të ndryshme. Një porcion i lartë i llojeve aloktone ndodhet i shpërndarë në vendet e ndryshme përgjatë basenit të Mesdheut.

Shqipëria si një prej vendeve që lagen nga Deti Mesdhe, dekadat e fundit është bërë pjesë e këtyre ndryshimeve. Gjithashtu, të tilla specie ndodhen të shpërndara në ujërat e brendshëm të vendeve të Ballkanit. Korridoret kryesore të shpërndarjes së tyre janë lumenjtë dhe liqenet, si sistemi i lumenjve Ohër-Drin-Shkodër, i cili lag shumë vende në Ballkan dhe krijon konflikte interesi, meqë burimet ujore janë të shpërndarë jo në mënyrë të njëtrajtshme.

Konferenca u organizua në bashkëpunim me Institutin për Ruajtjen e Natyrës në Shqipëri (INCA), fakultetin e Bujqësisë dhe Mjedisit, UBT, Institutin e Gjeoshkencave dhe Energjisë, Ujit dhe Mjedisit, UPT, Fakultetin e Shkencave të Natyrës, UT, Ministrinë e Turizmit dhe Mjedisit, MTM, Ministrinë e Bujqësisë dhe Zhvillimit Rural, MBZhR dhe Shoqata & Biznesi.