Më 7 korrik, Gert Bogdani do të kishte festuar 45-vjetorin e lindjes. Në këtë ditë të ngarkuar me emocione, bashkëshortja e tij, Edlira Çepani, ka ndarë një mesazh prekës dhe plot dashuri në rrjetet sociale, duke kujtuar partnerin e jetës, i cili nuk është më fizikisht pranë saj, por vazhdon të jetojë në zemrën dhe kujtimet e saj.
Në postimin e saj, Çepani ka publikuar një foto të veçantë të çiftit, të realizuar më 7 korrik të vitit të kaluar, një kujtim i çmuar nga dita që simbolizonte jo vetëm ditëlindjen e tij, por edhe dashurinë dhe afërsinë e tyre të thellë. Në krah të fotos, ajo ka ndarë një mesazh të ndjerë që fton çdo njeri të reflektojë mbi rëndësinë e kohës dhe dashurisë që shpesh marrim të mirëqenë në përditshmërinë tonë.
“Faleminderit që erdhe në këtë botë dhe e bëre një vend më të mirë,” shkruan ajo. “Festojani ditëlindjet sa më shumë njerëzve të zemrës, thuajani sa rëndësi kanë për ju çdo ditë, thuajani në çdo moment sa i doni, përqafojini sa më shumë, dëgjojini, buzëqeshuni sa më shumë. Sepse një ditë do mbeten veç kujtimet e gjithë këtyre gjërave.”
Mesazhi i saj është një thirrje e heshtur për të mos lënë asnjë fjalë të pathënë dhe asnjë ndjenjë të papërjetuar me njerëzit që duam, sepse jeta është e çmuar dhe e paparashikueshme. Kujtimi i Gert Bogdanit, një figurë e njohur në politikë dhe në shoqërinë shqiptare, vazhdon të jetojë përmes dashurisë që ai dha dhe kujtimeve që la pas.
