Barbie po bën histori sërish, këtë herë jo vetëm si një ikonë mode, por si një përfaqësuese e realitetit të shumë fëmijëve në mbarë botën. Mattel ka lançuar një Barbie të re me diabet tip 1, e pajisur me monitor glukoze në krah, të stilizuar me zemra rozë, dhe me pompë insuline të vendosur në bel. E gjithë kjo vjen me një veshje blu me pika dhe një smartphone ku mund të kontrollohen nivelet e sheqerit, duke e bërë këtë lodër jo vetëm të bukur, por edhe të vërtetë.
Ky model u krijua në bashkëpunim me organizatën Breakthrough T1D, për të siguruar që gjithçka është sa më reale dhe edukative për fëmijët që përballen me këtë sëmundje kronike. Qëllimi është i qartë: të normalizohet përvoja e jetesës me diabet dhe fëmijët që kanë këtë gjendje të ndihen të përfaqësuar dhe të fuqizuar në lojërat e tyre.
Barbie jo vetëm që vishet bukur, por tashmë çon edhe një mesazh të fuqishëm për përfshirjen dhe vetëbesimin. Ajo dëshmon se edhe me një sëmundje kronike, mund të jesh e bukur, e zonja dhe, si gjithmonë, pa u ndarë nga ngjyra e saj ikonike rozë.
