Hip-hopi i viteve ’90, pushtoi shfaqjen e “Pepsi Super Bowl LVI”. Të ashtuquajturit “Gangsterët origjinalë”, producenti i suksesshëm Dr. Dre dhe Snoop Dogg performuan së bashku me Eminem, Kendrick Lamar dhe mbretëreshën e R&B, Mary J. Blige.
Kjo shënoi jo vetëm herën e parë që artistët e Hip-hopit ishin interpretuesit kryesorë për shfaqjen e pjesës së parë, por gjithashtu i dha mundësinë gjeneratës së re për të shijuar dhe vlerësuar ikonat e asaj kohe. Performanca, nisi nga Snoop Dogg dhe Dr. Dre me superhitet “Next Episode” dhe “California Love”. Dre luajti në piano edhe një pjesë të “I Ain’t Mad At Cha”, në nderim të ish-bashkëpunëtorit dhe reperit të West Coast, Tupac Shakur.
I ftuari surprizë ishte gjithashtu reperi 50 Cent, i cili u shfaq për të interpretuar hitin e të gjitha kohërave “In Da Club”. Performanca u pasua nga Mary J Blige, Kendrick Lamar dhe kulmoi me interpretimin e këngës historike të Eminem “Lose yourself”, i cili e përfundoi këngën duke u gjunjëzuar – një gjest i bërë i famshëm nga ish-mbrojtësi i NFL, Colin Kaepernick, si një akt proteste kundër brutalitetit të policisë dhe diskriminimit racor.
